Lokalitet 5

I aust heller flata svak ned til i enden av flata ved om lag ti høgdemeter over havet, ved det som eingong har vore ei strandbunden vik som ligg mellom 5 og 10 høgdemeter over havet. I sør er det bart berg før lendet går ned til myrflata i vika. I vest ender flata ved ein bergvegg som går ned til ein myrflate som ligg ved om lag fem høgdemeter over havet i det som eingong har vore ei strandbunden vik og eit sund.

Lokaliteten er definert av fem funnførande prøvestikk: JA31, JA32, JA33, JA34 og JA36. Den er avgrensa av tre funntomme prøvestikk og elles delvis av lendetilhøva, særleg i nord ved berg, i aust ved flekker av bart berg, i sør ved område med bart berg og i vest ved bergvegg. Det er funne 14 funn på lokaliteten som er fordelt på dei fem funnførande prøvestikka.

Funna er av bitar og avslag. Råstoff er av flint, kvarts og bergkrystall. Gjenstandane som er funne på lokaliteten kan ikkje brukast til å typologisk datere lokaliteten til ein bestemt arkeologisk tidsperiode.

Strandforskyvningskurva for området viser at lokaliteten var strandbunden i mellommesolitikum (om lag 8200–6300 f.Kr.) og seinare igjen etter tapestransgresjonen i tidlegneolitikum (om lag 4000–3500 f.Kr.).